Polo peche de camas, polo deterioro da atención primaria, polo acoso á sanidade pública

Creación do Consello Local de Saúde de A Coruña o 30 de outubro de 2018
Amosando publicacións coa etiqueta Suicidio. Amosar todas as publicacións
Amosando publicacións coa etiqueta Suicidio. Amosar todas as publicacións

martes, 5 de setembro de 2017

10 de setembro: Día Mundial pola Prevención do Suicidio


CONVOCATORIA PARA O DIA MUNDIAL DE PREVENCIÓN DO SUICIDIO

O próximo dia 10 de setembro realízanse actos en todo o mundo por iniciativa da Asociación Mundial para a Prevención do Suicidio e a Organización Mundial da Saúde.

O obxectivo é informar, sensibilizar, confrontar o estigma, recordar e reivindicar compromiso, en especial dos gobernos, coa prevención.

Neste ano, cando vimos de saber que outra vez aumentou en Galicia a cantidade persoas falecidas por esta causa, o Movemento Galego da Saúde Mental convoca a todas/os a participar no acto que se realizará en Santiago

10 de setembro Día Mundial pola Prevención do Suicidio

345 suicidios en Galicia no 2016
345 badaladas pola prevención

Praza do Obradoiro

Ás 12 da mañá en Santiago


Movemento Galego da Saúde Mental

xoves, 9 de febreiro de 2017

Un suicidio e unha denuncia por agresión sexual en Conxo!!

Un suicidio e unha denuncia por agresión sexual en Conxo!!. Algo tiña que pasar cando os recortes e o deterioro dos servizos é a xestión que prioriza o Sergas.

Reproducimos o comunicado do Movemento Galego de Saúde Mental:

Hai tres anos que dende o Movemento Galego da Saúde Mental, na nosa primeira declaración, chamamos a atención sobre o deterioro progresivo no que se atopaba a atención á saúde mental en Galicia.
Sinalamos como causas máis destacadas dese deterioro os recortes sanitarios e as formas de xestión sen planificación e obstaculizadoras da participación dos profesionais da Sanidade Pública no facer cotián dos servizos e unidades asistenciais.
Tamén salientamos que como consecuencia diso se estaba a comprometer a calidade asistencial e a seguridade dos pacientes.
Recentes acontecementos na Unidade de Hospitalización Psiquiátrica do Hospital Médico-Cirúrxico de Conxo materializaron desgraciadamente estes pronósticos. O falecemento dunha paciente por suicidio e a denuncia, uns días antes, dunha agresión sexual por parte doutra paciente (ámbalas dúas ingresadas nesa Unidade) son cuestións de indudable gravidade que han de entenderse no marco do deterioro antes salientado.


Cómpre recordar que hai tempo que se vén denunciando publicamente dende diferentes instancias a escasa dotación desa Unidade, a frecuente retirada do persoal de Enfermería da mesma para cubrir necesidades doutros servizos do mesmo hospital (tamén debilitados polos recortes de persoal), a escasa actividade dos pacientes ingresados, a carencia de Terapeuta Ocupacional no equipo, a falta de medios para a coordinación e elaboración de plans terapéuticos nos que participen e se coordinen todos os profesionais, e a repetición de agresións ó persoal. Sen embargo, por quen ten a obriga de dirección e xestión, nada se fixo ante estas carencias e advertencias para corrixir o arriscado rumbo que se estaba a seguir.
Os acontecementos que hoxe motivan este comunicado público teñen unha dolorosa dimensión humana. Se se poden previr, non poden aceptarse silenciándoos ou permanecendo pasivos ante os mesmos, e menos aínda por profesionais da saúde mental. A sociedade ten dereito a saber o que ocorre nos servizos públicos que sustenta co seu esforzo.
Feitos así deben ser coñecidos publicamente, e tamén han de ser tratados polos responsables do SERGAS como graves indicadores de que algo vai moi mal na atención á saúde mental.
A sua prevención futura esixe a adopción de inmediato das medidas oportunas, recollendo as aportacións dos profesionais, en particular de Enfermería, para a mellora da calidade da hospitalización psiquiátrica. E iso non se logrará con meras medidas de reforzamento do control dos pacientes ou de aumento da coerción sobre os mesmos. Polo contrario, esa prevención debe realizarse reforzando a finalidade terapéutica da hospitalización e o respecto aos dereitos fundamentais das persoas, dotando de profesionais suficientes e coa cualificación adecuada a esas Unidades (con especial urxencia debe dotarse a terapia ocupacional e profesionais de enfermería), implantando nelas formas de traballo participativas e coordinadasentre tódolos profesionais, definindo protocolos e instrucións de traballo claras ante os potenciais riscos, e rexistrando documentalmente de xeito sistemático a actividade desenvolvida por tódolos profesionais que prestan asistencia.
Diversos compoñentes da calidade asistencial na sanidade se viron afectados pola xestión que se fixo da crise económica. En concreto, nos casos que aquí denunciamos destacan as intolerables carencias na garantía de seguridade das persoas cando reciben atención sanitaria, a vulneración do seu dereito a tratamentos e coidados sanitarios acordes cos coñecementos actuais e en igualdade cos demais pacientes e usuarios, e o escaso respecto aos seus dereitos
fundamentais e sanitarios.


venres, 1 de xullo de 2016

A Badalada do 30 de xuño nos Medios de Comunicación desde A Coruña: Plan galego de prevención do Suicidio XA!

Acción exitosa en canto á transmisión da preocupación por este grave problema: o suicidio e a necesidade de contar cun Plan Galego de Prevención do Suicidio













Badalada na Coruña pedindo un Plan Galego de Prevención do Suicidio XA!

A primeira causa externa de morte en España
Cada 14 segundos unha persoa se suicida no mundo
A taxa de suicidios por 100000 habitantes é de 14 en Galiza e de 8,3 en España
Aumentou un 59,40% entre 2011 e 2013 no grupo de 10 a 24 anos e nun 39,2% no de 45 a 64 anos.
No 2014 foron 394 persoas no territorio galego.
No 2015: 324.

E seguimos sen un PLAN GALEGO DE PREVENCIÓN DO SUICIDIO.

A pesar de que está recoñecido que é previble.

Hoxe fixéronse concentracións pedindo este PLAN en Ferrol, A Coruña, Santiago, Ribeira, Cangas, Pontevedra, Vigo, Lugo e Ourense. Achégase fotos e video da concentración da Coruña:


Con iste acto, ademáis de amosar a nosa solidariedade coas persoas e familias afectadas por este problema, queremos tamén facer un chamamento a:
  • Elaboración dun Plan Galego sobre o Suicidio de carácter multisectorial, dotado dos recursos necesarios para afrontar a gravidade do problema e  artellado no Plan de Saúde Mental de Galicia.
  • Que se constitua un Comité Técnico para elaborar dito Plan.
  • Creación de Comisións Clínico-Asistenciais en cada Xerencia de Área de carácter  multiprofesional e multisectorial destinadas a coñecer e estudar a realidade do suicido nesas zonas e propostas de intervención
Como medidas de caracter máis inmediato, vemos necesario:
  • Que tanto Conselleria de Sanidade como o SERGAS  promovan actividades informativas, en colaboración cos medios de comunicación, destinadas a poboación  sobre o suicidio para sensibilizar e  desestigmatizar o problema.
  • Incrementar o nivel coñecemento dos profesionais de Atención Primaria de Saúde sobre o problema e mellorar a súa capacidade para avaliar o risco e poder realizar as actuacións preventivas axeitadas.
  • Por en marcha protocolos específicos de atención a persoas con conducta suicida e a afectados por suicidio consumado.
  • Facilitar con carácter prioritario  o acceso a recursos asistenciais as persoas en risco, incrementar o seguimento, e intensificar a atención sanitaria e social das mesmas.

martes, 28 de xuño de 2016

É posible prever o suicidio! Por un Plan Galego de Prevención do suicidio. Concentración no Obelisco o xoves 30 ás 8 da tarde

PLAN GALEGO DE PREVENCIÓN DO SUICIDIO, XA!

O suicidio é a principal causa externa de morte en España. E está en aumento, sobre todo entre xente xove, de 10 a 24 anos, onde aumentou un 59,40% entre o 2011 e o 2013.
Hai que lembrar que a prevención do suicidio é eficaz e está demostrada.

 É un problema de saúde pública, a solución é multifactorial, por iso precisa un PLAN que afecte a diferentes áreas de goberno.

As taxas galegas son moi superiores ás españolas. Aquí aínda urxe máis ese PLAN. Ver gráfico:
Taxa de suicidios por 100000 habitantes en Galiza e España 2010-2014

SOS Sanidade Pública e o Movemento Galego de Saúde Mental van facer concentracións en Galiza este xoves día 30 ás 8 da tarde para dar a BADALADA pola prevención do suicidio. 
Para reclamar, máis unha vez, a Feijoo e ao goberno galego un Plan de Prevención, algo que teña credibilidade e sexa eficaz.

Convidamos á cidadanía a participar nesta concentración.


domingo, 26 de xuño de 2016

Concentración e badalada en prevención do suicidio o xoves 30 de xuño no Obelisco ás 8 da tarde na Coruña

POR UN PLAN GALEGO DE PREVENCIÓN DE SUICIDIO
 
O movemento galego de saúde mental e sos sanidade pública convocan unha badalada en prevención do suicicio o xoves 30 de xuño en toda Galiza.

Na Coruña farase a concentración e darase a badalada no Obelisco ás 8 da tarde.

1 badalada en recordo da morte de 1 persoa cada día.
1 badalada en recordo da morte do día.


PLAN GALEGO DE PREVENCIÓN DO SUICIDIO, XA!

En Galicia morre por suicidio unha persoa cada día. Esa realidade agravouse dende o comezo da crise alcanzando no ano 2014 o seu teito con 394 mortes por esta causa.

As políticas desenvolvidas polo Goberno Central e a Xunta de Galicia fronte á crise desprotexeron a sectores sociais vulnerables incrementando o risco de suicidio na sociedade. Desas políticas cómpre destacar como especialmente importantes: a carencia de políticas activas de emprego e un elevadísimo paro prolongado, a redución da protección social, o deterioro da sanidade pública e en particular o debilitamento da Atención Primaria de Saúde, a tolerancia gubernamental coa banca e a súa agresividade respecto ó cobro dos préstamos hipotecarios coa conseguinte vaga de desafiuzamentos.
 
Pero Galicia padeceu dende sempre elevadas taxas de suicidio. Sofre un grave problema de saúde pública tal como o define a Organización Mundial da Saúde (OMS). Só agora, cando este estado de cousas se ve agravado pola crise , nos decatamos de que convivimos impasibles cunha realidade intolerable. Realidade diante da cal os gobernos non só non fixeron nada senón que mesmo negaron as cifras das propias institucións oficiais, chegando no caso da Xunta e do partido gobernante en Galicia a rexeitar no Parlamento Galego nesta lexislatura (ata en tres ocasións) iniciativas realizadas pola oposición propoñendo elaborar o plan de prevención.
 
As recomendación da OMS comezan por afirmar que o suicidio pode previrse eficazmente e rematan por presentar o obxectivo de reducir en cada país nun 10% para o ano 2020 o número de mortes por esta causa. Imperativamente chama ós Gobernos a liderar e a desenvolver Plans de Prevención do Suicidio.
 
Sobre esta base, nós, o Movemento Galego da Saúde Mental, respostando a ese mandato e cumprindo co noso compromiso fundacional, iniciamos o pasado 3 de maio a campaña Badaladas pola prevención do suicidio, coa finalidade de sensibilizar á sociedade fronte a esta cuestión, e para reclamar o cumprimento das obrigas que os nosos gobernantes  teñen coa protección da saúde e da vida da poboación. É así que esiximos que con urxencia se elabore ese plan, por unha comisión técnica capaz e crible, cun carácter multisectorial, articulado co necesario Plan Galego de Saúde Mental, e dotado suficientemente.
 
É por todo iso que xunto con SOS-Galicia facemos convocatoria para o 30 de xuño en diferentes cidades e vilas de Galicia ás 8 da tarde, para que soen badaladas para recordar a toda a sociedade que unha persoa máis morreu por suicidio na nosa terra ese día, e que seguimos sen un plan de prevención.
 
30 DE XUÑO ÁS 8 DA TARDE, BADALADAS POLA PREVENCIÓN DO SUICIDIO
 
ACODE ÁS CONCENTRACIÓNS
 
MOVEMENTO GALEGO DA SAÚDE MENTAL
https://www.facebook.com/movementogalegodasaudemental

martes, 3 de maio de 2016